4 сакавіка святары цэлебруюць св.Імшу ў белым арнаце, хоць ідзе Вялікі пост і колер яго фіялетавы. Змена колераў вынікае з таго, што мы святкуем успамін св. Казіміра, апекуна Гродзенскай дыяцэзіі. Гэта ні ў якім разе не псуе атмасферу часу пакаяння, бо пакаянне — гэта шлях навяртання, вяртання да Бога, і святыя даюць нам прыклад, што гэты шлях магчымы кожнаму.

У  Евангеллі мы слухаем словы Пана Езуса, прамоўленыя на Апошняй Вячэры, якія з’яўляюцца падрыхтоўкай вучняў да перажывання драмы Крыжа і радасці Уваскрасення, дзе Пан Езус гаворыць нам аб святасці.

Святы — сябар Бога. Гэта не сяброўства роўных, Бог сябар, а не калега. Відавочна, што Ён бясконца большы за нас. Вось чаму менавіта Ён прапануе нам сяброўства, сапраўднае сяброўства. Як і ўсіх сяброў, нас аб’ядноўвае агульнае дабро. Бог хоча нашага шчасця, збаўлення ўсяго свету. Будучы яго сябрам, мы хачам таго ж.

Сяброўства азначае давер і своеасаблівае партнёрства. Бог давярае нам, адкрывае нам сваю волю і планы. Канечне, у сяброўстве з Богам партнёрства не азначае роўнасці, але, Бог успрымае нас сур’ёзна. Найважнейшай праявай гэтага з’яўляецца тое, што Бог робіць нас свабоднымі і хоча, каб мы правільна карысталіся гэтай свабодай.

Такім сябрам Бога быў каралевіч Казімір. Малады чалавек, які вельмі хутка ўзяў на сябе адказнасць за справы каралеўства. Ён не імкнуўся да ўлады, ён проста выконваў адведзеную яму ролю, як сын караля. Выконваў свае абавязкі з пачуццём адказнасці перад Богам і людзьмі. Ён кіраваў і ў той жа час падпарадкоўваўся. Найперш Богу, верна выконваючы ўказанні маральнага закону, а потым каралю, а адначасова свайму бацьку, якім быў адным з найвялікшых польскіх манархаў – Казімір IV Ягелончык.

Кожны з нас пакліканы да святасці, Бог прапануе кожнаму з нас сваё сяброўства.

Няхай св .Казімір дапаможа нам на шляху вялікапоснага навяртання, каб мы хацелі сябраваць з Богам, з радасцю прымаючы Яго запаведзі, якія з’яўляюцца для нас дабром.

Сёння разам з
св. Казімірам кленчым перад табой, Найсвяцейшая Панна Марыя, і просім пакаяння, міру і прымірэння.